مملکت کے تاریخی شہر العلا میں 18 اپریل کو ثقافتی ورثے (یادگاروں اور مقامات) کا عالمی دن منایا گیا۔
مزید پڑھیں
اس موقع پر خطے کے ہزاروں سال پرانے تاریخی ورثے اور اس کی ثقافتی اہمیت کو اجاگر کیا گیا، جو مملکت کی قدیم شناخت اور تہذیبی گہرائی کا منہ بولتا ثبوت ہے۔
العلا اپنے متنوع ورثے کی وجہ سے دنیا بھر میں ممتاز مقام رکھتا ہے، جہاں قدیم تجارتی راستوں اور انسانی تہذیبوں کا سنگم رہا ہے۔
یہاں موجود ’الحجر‘ نامی مقام کو یونیسکو کی عالمی ثقافتی ورثہ
فہرست میں شامل ہونے والے پہلے سعودی مقام کا اعزاز حاصل ہے۔
العلا کے قدیم قصبے میں 900 سے زائد مٹی کے بنے ہوئے مکانات موجود ہیں، جو روایتی طرز تعمیر اور سماجی زندگی کی عکاسی کرتے ہیں۔
یہ تاریخی مقامات انسانی زندگی کے ارتقا اور خطے کی قدیم تعمیراتی خصوصیات کو دستاویزی شکل میں محفوظ رکھنے کا اہم ذریعہ ہیں۔
یاد رہے کہ عالمی یوم ورثہ کی بنیاد 1983 میں یونیسکو کی جنرل کانفرنس کے فیصلے کے بعد رکھی گئی تھی۔
اس دن کو منانے کا مقصد معاشروں کی شناخت میں ثقافتی ورثے کی اہمیت کو اجاگر کرنا اور ان نایاب مقامات کے تحفظ کے حوالے سے عالمی سطح پر شعور بیدار کرنا ہے۔
العلا میں قدیم نقش و نگار، آثار قدیمہ اور تاریخی عمارات انسانی تجربات کی یادوں کو زندہ رکھے ہوئے ہیں۔
یہ ورثہ اپنی اصلیت اور سالمیت کی بدولت تاریخی اقدار کو اگلی نسلوں تک منتقل کرنے اور انسانی تہذیب کے شواہد پیش کرنے میں کلیدی کردار ادا کرتا ہے۔
سعودی حکام العلا کے ان مقامات کی بحالی اور تزئین و آرائش کے لیے خصوصی منصوبوں پر کام کر رہے ہیں۔
ان کوششوں کا مقصد ثقافتی ورثے کے تحفظ کے عالمی اہداف کو پورا کرنا اور اس عظیم انسانی میراث کو پائیدار بنیادوں پر محفوظ بنا کر دنیا میں متعارف کروانا ہے۔
