حرمین انتظامیہ نے آج ہفتے کو خانہ کعبہ کے غلاف کے نچلے حصے کو 3 میٹر اوپر اٹھانے کا عمل مکمل کر لیا ہے۔
یہ اقدام حج 1447 ہجری کے سیزن کی تیاریوں کے سلسلے میں کیا گیا ہے۔
سعودی پریس ایجنسی کے مطابق اس عمل کے دوران کسوہ کے نچلے حصے کو کھولا گیا، اس کے کونوں کو الگ کیا گیا اور پھر اسے 3 میٹر کی اونچائی پر اٹھا کر مضبوطی سے فکس کیا گیا ہے۔
اس کے ساتھ سفید کپڑا بھی لگایا گیا اور مخصوص جگہوں پر قندیلیں دوبارہ نصب کی گئیں، یہ سب منظم اور انتہائی دقیق طریقۂ کار کے تحت انجام پایا گیا ہے۔
انتظامیہ کے مطابق یہ مکمل عمل تقریباً دو گھنٹے میں مکمل ہوا اور اس میں 34 ماہر کاریگروں نے حصہ لیا، جنہوں نے انتہائی ہم آہنگی اور مہارت کے ساتھ کام انجام دیا ہے۔
انتظامیہ نے کہا ہے کہ یہ اقدام ہر سال کیا جانے والا معمول کا حصہ ہے، جس کا مقصد خانہ کعبہ کے غلاف کو چھونے یا نقصان سے محفوظ رکھنا ہے، خاص طور پر حج کے دوران جب طواف کرنے والوں کی تعداد بہت زیادہ ہوتی ہے۔
یہ عمل اعلیٰ حفاظتی اور پیشہ ورانہ معیار کے مطابق انجام دیا گیا، جبکہ مقام کی حرمت اور عظمت کو مکمل طور پر مدنظر رکھا گیا۔
اٹھائے گئے حصے کو سفید روئی کے کپڑے سے چاروں طرف 2 میٹر چوڑائی میں ڈھانپ دیا گیا، جو ہر سال کیا جانے والا باقاعدہ انتظام ہے تاکہ حجاج کرام کو بہتر سہولت اور عبادات میں آسانی فراہم کی جا سکے۔