جزائر فرسان میں جاری الحرید نائٹس 22 فیسٹیول سیاحوں کی بڑی تعداد کو اپنی جانب متوجہ کررہا ہے۔
مزید پڑھیں
سبق ویب سائٹ کے مطابق ایک ہفتے تک جاری رہنے والے ان ثقافتی اور تفریحی پروگراموں کا مقصد خطے کی منفرد سیاحتی حیثیت کو اجاگر کرنا اور مقامی ورثے کو فروغ دینا ہے۔
یہ فیسٹیول مختلف علاقوں سے آنے والے سیاحوں کے لیے نہایت پرکشش ہے، جو یہاں کی قدرتی خوبصورتی اور ثقافتی دولت سے لطف اندوز ہو رہے ہیں۔
یہاں منعقدہ پروگراموں میں ساحلی سیر، تاریخی دیہات کا دورہ اور قدرتی پانیوں کا مشاہدہ شامل ہے جو سیاحوں کو مسحور کر رہے ہیں۔
سیاحوں کے لیے یہاں کے ریتلی ساحل اور شفاف نیلا پانی خاص توجہ کا مرکز ہیں۔
اس کے ساتھ ساتھ تاریخی قریہ القصار کا دورہ شرکا کو قدیم طرز زندگی سے روشناس کراتا ہے، جبکہ مینگروو کے درخت اس مقام کو ایک منفرد ماحولیاتی حیثیت اور دلکشی عطا کرتے ہیں۔
میلے کے دوران مقامی دستکاروں اور ہنر مندوں کے لیے خصوصی اسٹالز بھی لگائے گئے ہیں۔ ان میں مقامی کھانوں اور ہاتھ سے بنی اشیا کی نمائش کی جا رہی ہے، جس سے نہ صرف مقامی ثقافت کو فروغ مل رہا ہے بلکہ کمیونٹی کی معاشی سرگرمیوں کو بھی بھرپور تقویت حاصل ہو رہی ہے۔
انتظامیہ کی جانب سے سیاحوں کی سہولت کے لیے بہترین انتظامات کیے گئے ہیں، جس سے سیاحتی سرگرمیوں میں مزید تیزی آئی ہے۔
یہاں بحری سرگرمیوں کے ذریعے سیاحوں کو حیاتیاتی تنوع سمجھنے کا موقع مل رہا ہے، جو ماحولیاتی آگاہی پیدا کرنے میں بھی اہم کردار ادا کر رہا ہے۔
یہ تمام کوششیں سعودی وژن 2030 کے اہداف کے عین مطابق ہیں، جن کا مقصد جزائر فرسان کو مملکت کے اہم سیاحتی مراکز میں شامل کرنا ہے۔
ان پروگراموں سے نہ صرف سیاحت کو فروغ مل رہا ہے بلکہ مقامی معیشت اور ثقافتی ورثے کو بھی نئی جہتیں مل رہی ہیں۔