مملکت میں سیاحت کے شعبے سے وابستہ ماہرین اور ٹریول ایجنسیوں کی جانب سے کیے گئے ایک سروے میں انکشاف ہوا ہے کہ 70 فیصد توقع ہے کہ سیاحتی سرگرمیاں اگلے 90 روز میں اپنے معمول پر واپس آجائیں گی۔
مزید پڑھیں
امریکا اور ایران کے درمیان 15 روزہ عارضی جنگ بندی اور کشیدگی میں کمی کے بعد سیاحتی سرگرمیوں میں بہتری کے آثار نمایاں ہوئے ہیں۔
سروے کے مطابق ماہرین کا کہنا ہے کہ موسم گرما کی تعطیلات کے قریب آتے ہی مسافروں کا اعتماد بحال ہونا شروع ہو گیا ہے۔
سروے نتائج
سروے میں شریک 20 فیصد ماہرین نے سعودی عرب اور خلیجی ممالک
میں سیاحتی شعبے کی مانگ کو تیزی سے پورا کرنے کی صلاحیت پر مکمل اعتماد کا اظہار کیا ہے۔
تاہم 10 فیصد شرکا نے جنگ بندی کے فوراً بعد بہتری کی تصدیق بھی کی ہے۔
سیاست اور سیاحت کا تعلق
سروے میں شریک کسی بھی شخص نے صرف جنگ بندی کو سیاحت کی مکمل بحالی کے لیے کافی قرار نہیں دیا۔
اس کا واضح مطلب یہ ہے کہ سیاحتی شعبے کی بحالی کا انحصار محض عارضی وقفے کے بجائے طویل مدتی سیاسی استحکام پر بھی ہے۔
طلب میں اضافہ
ٹریول ایجنسیوں نے رپورٹ کیا ہے کہ جنگ بندی کے اعلان کے بعد سے معلومات کے حصول اور بکنگ میں ردوبدل کی درخواستوں میں نمایاں اضافہ ہوا ہے۔
خاص طور پر یورپی اور ایشیائی ممالک کے سفر کے حوالے سے مسافروں کی دلچسپی میں تیزی دیکھی گئی ہے۔
ماہرینِ ٹریول انڈسٹری
ٹریول انڈسٹری کے ماہر اور کونسیئرج کے جنرل منیجر توفیق ابو الوفا کا کہنا ہے کہ بکنگ میں تبدیلیوں کی درخواستیں مسافروں کے اعتماد کی بتدریج بحالی کی عکاس ہیں۔
اسی طرح راحة ٹریول اینڈ ٹورازم کے سعد العتیبی نے بھی تصدیق کی کہ مارکیٹ میں یک دم نئی جان پڑ گئی ہے۔
سیاحوں کا محتاط رویہ
سیاحتی ماہر خالد باوزیر کے مطابق سعودی مسافروں کا رویہ اب پہلے سے زیادہ محتاط اور باشعور ہو چکا ہے۔
مسافر اب ایسے سفری پیکیجز کو ترجیح دیتے ہیں جن میں انشورنس اور مفت منسوخی جیسے لچکدار آپشنز موجود ہوں، جو مارکیٹ میں پختگی کی علامت ہے۔
خلیجی خطے کی تیاری
ماہرین کا کہنا ہے کہ سعودی عرب اور دیگر خلیجی ممالک کا سیاحتی شعبہ جدید بنیادی ڈھانچے اور بڑے سرمایہ کاری منصوبوں کے باعث کسی بھی صورتحال کے لیے تیار ہے۔
ایئر لائنز اور ہوٹلوں نے بھی بدلتے ہوئے حالات کے مطابق اپنی پالیسیوں کو لچکدار بنایا ہے۔
مجموعی طور پر دیکھا جائے تو امریکا اور ایران کے مابین 15 روزہ جنگ بندی نے سعودی اور خلیجی سیاحتی منڈی میں ایک مثبت لہر پیدا کی ہے۔
اگرچہ مکمل بحالی ابھی باقی ہے، تاہم سیاحوں کا اعتماد اور شعبے کی تیاری اس بات کی نوید ہے کہ اگلے 3 ماہ میں سیاحت اپنے معمول پر لوٹ آئے گی۔