سعودی عرب کی وزارت خارجہ نے امریکہ کے صدر ڈونلڈ ٹرمپ اور پاکستان کے وزیر اعظم محمد شہباز شریف کے اعلان پر خوشی کا اظہار کیا کہ امریکہ اور اسلامی جمہوریہ ایران کے درمیان جنگ بندی کا معاہدہ طے پا گیا ہے۔
وزارت خارجہ نے اس موقع پر پاکستان کے وزیر اعظم اور پاک فوج کے سربراہ عاصم منیر کی اس معاہدے تک پہنچنے میں کی گئی کارگر کوششوں کو سراہا ہے۔
مزید پڑھیں
سعودی پریس ایجنسی کے مطابق سعودی عرب نے اس بات پر زور دیا کہ وہ پاکستان کی ثالثی کی کوششوں کی حمایت کرتا ہے تاکہ ایک دائمی معاہدے کے ذریعے امن و استحکام قائم ہو اور وہ تمام مسائل حل ہوں جنہوں نے دہائیوں سے خطے میں سلامتی و استحکام کو متاثر کیا ہے۔
اسی کے ساتھ سعودی عرب نے آبنائے ہرمز کو بحری جہاز رانی کے لیے کھلا رکھنے کی ضرورت پر بھی زور دیا، جیسا کہ 1982 کی اقوام متحدہ
کے سمندری قانون کے معاہدے میں مقرر ہے اور کسی بھی قسم کی پابندی کی مخالفت کی۔
سعودی عرب نے امید ظاہر کی کہ یہ جنگ بندی خطے میں جامع اور دیرپا امن قائم کرنے کا موقع فراہم کرے گی، علاقائی سلامتی کو مضبوط کرے گی، اور خطے کے ممالک کی خودمختاری، امن اور استحکام کے خلاف کسی بھی جارحیت یا پالیسی کو روکے گی۔