اسرائیلی وزیر دفاع یسرائیل کاٹز نے اعلان کیا ہے کہ اسرائیلی فوج نے ایران کی سب سے بڑی پیٹرو کیمیکل تنصیبات پر شدید فضائی حملے کیے ہیں۔
مزید پڑھیں
سبق ویب سائٹ کے مطابق ان کارروائیوں کے نتیجے میں ایران کی مجموعی پیٹرو کیمیکل برآمدات کا 85 فیصد حصہ معطل ہو چکا ہے، جس سے تہران کو اربوں ڈالر کا نقصان ہوا ہے۔
دوسری جانب ایرانی ذرائع نے رپورٹ کیا ہے کہ عسلوئیہ کے علاقے میں واقع پارس جنوبی گیس فیلڈ کی معاون تنصیبات کو نشانہ بنایا گیا ہے۔
ان حملوں میں بجلی، پانی اور آکسیجن فراہم کرنے والے یونٹس متاثر
ہوئے، جس کے باعث پیٹرو کیمیکل کمپلیکس کے متعدد پیداواری یونٹس میں بجلی کی فراہمی منقطع ہو گئی ہے۔
ایرانی میڈیا فارس اور میزان نے تصدیق کی ہے کہ عسلوئیہ میں گیس فیلڈ کی سہولیات پر حملہ کیا گیا ہے۔
ایرانی حکام نے ان حملوں کا ذمہ دار امریکہ اور اسرائیل کو ٹھہرایا ہے، تاہم یہ واضح کیا کہ خود پیٹرو کیمیکل کمپلیکس براہ راست تباہی سے محفوظ رہا ہے۔
اسرائیلی وزیر دفاع یسرائیل کاٹز نے تل ابیب سے جاری بیان میں کہا کہ عسلوئیہ میں نشانہ بننے والی تنصیب ایران کی کل پیٹرو کیمیکل پیداوار کا 50 فیصد حصہ فراہم کرتی ہے۔
یاد رہے کہ گزشتہ ہفتے بھی ایک اہم تنصیب کو نشانہ بنایا گیا تھا، جس کے بعد اب دونوں بڑی تنصیبات مکمل طور پر غیر فعال ہو چکی ہیں۔
اسرائیلی وزیر دفاع کے مطابق یہ کارروائیاں ایرانی معیشت کے لیے ایک سخت دھچکا ہیں، جس سے حکومتی نظام کو اربوں ڈالر کا خسارہ ہوگا۔
کاٹز نے مزید کہا کہ پیٹرو کیمیکل سیکٹر ایرانی پاسداران انقلاب کی مالی معاونت اور عسکری قوت کی تعمیر میں کلیدی کردار ادا کرتا ہے۔
حملوں کے بعد پیدا ہونے والی صورتحال پر تہران کی جانب سے مزید تفصیلات فراہم نہیں کی گئی ہیں۔
توانائی کے ماہرین کا کہنا ہے کہ ان تنصیبات کی بندش سے ایران کی برآمدی صلاحیت پر طویل مدتی منفی اثرات مرتب ہوں گے اور اسٹریٹجک مالیاتی ذرائع بری طرح متاثر ہوں گے۔