کویت کی وزارتِ صحت نے آج پیر کی صبح کہا ہے کہ مرکزی آپریشن روم کو اطلاعات موصول ہوئی ہیں کہ ملک کے شمالی علاقے میں رہائشی علاقوں پر ایرانی حملے کے نتیجے میں متعدد دھماکہ خیز اشیا اور ٹکڑے گرے ہیں۔
مزید پڑھیں
سبق ویب سائٹ کے مطابق وزارت کے ترجمان ڈاکٹر عبداللہ السند نے بتایا کہ ایمرجنسی میڈیکل ٹیموں اور ایمبولینس خدمات نے فوری طور پر واقعے سے نمٹنا شروع کر دیا۔ ایمبولینس ٹیمیں فوری طور پر اطلاع کے مقام پر پہنچ گئیں تاکہ زخمیوں کا علاج کیا جا سکے۔
انہوں نے بتایا کہ دو افراد کو موقع پر طبی امداد دی گئی اور انہیں ہسپتال منتقل کرنے کی ضرورت نہ پڑی جبکہ ایک زخمی کو مزید
تشخیص اور علاج کے لیے الجہرہ اسپتال کے ایمرجنسی شعبے منتقل کیا گیا۔
مزید برآں، ایمرجنسی شعبوں میں وہ افراد بھی پہنچے جو خود ہسپتال آئے تھے، جس سے زخمیوں کی مجموعی تعداد 6 ہو گئی۔
زخمیوں میں سر اور اعضا پر ہلکے کٹنے کے زخم، دھماکے کی شدت کے سبب عارضی سماعت کے اثرات اور واقعے کی وجہ سے مختلف زخم شامل ہیں۔
ڈاکٹر السند نے بتایا ہے کہ تمام زخمیوں کی حالت مستحکم ہے اور انہیں پروٹوکول کے مطابق طبی امداد فراہم کی گئی اور کسی بھی سنگین پیچیدگی کی اطلاع نہیں ملی۔
میدان میں ٹیموں نے علاقے کا مکمل جائزہ بھی لیا تاکہ کسی اور زخمی کی موجودگی کا یقین کر لیا جا سکے۔
وزارتِ صحت نے زور دیا کہ صحت کا نظام ہر قسم کی ہنگامی صورتحال سے نمٹنے کے لیے 24 گھنٹے تیار ہے اور عوام سے اپیل کی کہ وہ اپنی حفاظت کے لیے سرکاری ہدایات اور متعلقہ حکام کی ہدایات پر عمل کریں۔