امریکی محکمہ شماریات کی جانب سے جاری کردہ تازہ اعداد و شمار کے مطابق مارچ کے دوران ملکی لیبر مارکیٹ میں نمایاں بحالی دیکھی گئی ہے۔
مزید پڑھیں
اس عرصے میں نان فارم سیکٹر میں ایک لاکھ 78 ہزار نئی ملازمتیں پیدا ہوئیں، جو کہ سال 2024 کے اختتام کے بعد سے اب تک کی بلند ترین سطح ہے۔
یہ اعداد و شمار بلومبرگ کے سروے میں لگائے گئے تمام تر اندازوں سے کہیں زیادہ بہتر ثابت ہوئے ہیں۔
ماہرین معاشیات پہلے ہی مارچ میں ملازمتوں کے مواقع بڑھنے کی
توقع کر رہے تھے، کیونکہ فروری کے اعداد و شمار میں غیر معمولی کمی دیکھی گئی تھی۔
فروری میں ملازمتوں کے مواقع میں کمی کی بڑی وجوہات میں ہیلتھ کیئر سیکٹر کے 30 ہزار سے زائد ملازمین کی ہڑتال اور شدید سرد موسم شامل تھا۔
ان عوامل کے باعث فروری کے ڈیٹا کو نظر ثانی کے بعد نیچے کی جانب ایڈجسٹ کیا گیا تھا۔
تازہ صورت حال کے مطابق ملک میں بے روزگاری کی شرح کم ہو کر 4.3 فیصد پر آ گئی ہے، تاہم اس کمی کا ایک سبب کچھ امریکی شہریوں کا لیبر فورس سے باہر نکل جانا بھی ہے۔
ملازمتوں کے حوالے سے سامنے آنے والے یہ مضبوط اعداد و شمار اب امریکی فیڈرل ریزرو کی توجہ افراط زر کے خطرات کی جانب مزید مرکوز کر سکتے ہیں۔
اس صورتحال میں توانائی کی قیمتوں میں تیزی بھی ایک بڑا عنصر ہے جو مشرق وسطیٰ کی جنگ کے باعث بڑھ رہی ہے۔