وزیرِ مواصلات اور انفارمیشن ٹیکنالوجی انجینئر عبد اللہ السواحہ نے کہا ہے کہ ولی عہد اور وزیر اعظم شہزادہ محمد بن سلمان کے پاس تین اہم حکمتِ عملیاں ہیں جن کا جلد اعلان کیا جائے گا۔
ان میں سے ایک ہدف یہ ہے کہ سعودی عرب عالمی سطح پر مصنوعی ذہانت کے بہترین پانچ مراکز میں شامل ہو اور اس شعبے میں سب سے زیادہ ترقی یافتہ ممالک میں شمار ہو۔
مزید پڑھیں
سبق ویب سائٹ کے مطابق انہوں نے کہا ہے کہ سعودی عرب مختلف شعبوں میں مصنوعی ذہانت کی ٹیکنالوجیز کے ذریعے مدد فراہم کر رہا ہے جیسے توانائی کا شعبہ، اور ساتھ ہی مصنوعی ذہانت کے بنیادی ڈھانچے کی بہتری، چپ سازی اور اس شعبے میں مہارت و تربیت پر کام کر رہا ہے۔
انہوں نے بتایا کہ سعودی عرب نے صحت اور حیاتیات کے شعبوں میں
مصنوعی ذہانت کے ذریعے اختراعات کی ہیں جہاں روبوٹک ٹیکنالوجی کی مدد سے سرجری اور پیچیدہ کام چند گھنٹوں میں مکمل کئے جا سکتے ہیں جبکہ پہلے یہ کئی ہفتے لیتے تھے۔
انہوں نے کہا ہے کہ سعودی عرب مصنوعی ذہانت میں سرمایہ کاری کر رہا ہے تاکہ مجموعی ترقی اور داخلی و عالمی سطح پر اعتماد قائم کیا جا سکے۔
وزیر مواصلات نے بتایا ہے کہ سعودی عرب کی امریکہ کے ساتھ وسیع شراکتیں اور اتحاد ہیں جو معیشت کو بہتر بنانے اور عالمی سطح پر بہترین ٹیکنالوجی مراکز قائم کرنے میں مدد دیتے ہیں۔
انہوں نے اس بات پر زور دیا کہ سعودی عرب مصنوعی ذہانت کے جدید مراکز قائم کرنے کی صلاحیت رکھتا ہے اور اس شعبے میں خصوصی مہارتیں موجود ہیں جو اسے دنیا کے دیگر ممالک کو ٹیکنالوجی اور AI کے شعبے میں خدمات فراہم کرنے کے قابل بناتی ہیں۔