جس میں شک ہو، اسے چھوڑ دو

حقیقت میں یہ ایمان کا کمال اور تقویٰ پرہیز گاری کا بلند مرتبہ ہے کہ آدمی زندگی کے ہر معاملہ میں رضائے الٰہی کے حصول کو پیش نظر رکھے، طاعات و عبادت میں مشغول رہے، گناہ اور معاصی سے دور رہے۔ 

زندگی میں بعض مراحل ایسے آسکتے ہیں جہاں حلال و حرام، جائز و نا جائز یا نیکی اور گناہ کی تمیز دشوار ہوجائے یا کسی وجہ سے آدمی شک و شبہ میں پڑ جائے کہ آیا یہ کام نیکی کا ہے یا گناہ کا؟ حلال ہے یا حرام؟ جائز ہے یا ناجائز ؟ 

ایسے ہی مواقع کے لئے رسول ﷲﷺ  کی یہ رہنمائی ہے کہ شک و شبہ کی چیز کو آدمی چھوڑ دے اور جس میں کوئی شک نہ ہو اس کو اختیار کرے۔ 

اسی کو کبھی دوسرے انداز میں یوں فرمایا کہ کسی چیز کے بارے میں دل کھٹکے تو سمجھے کہ یہ نیکی نہیں بلکہ گناہ ہے اور اس کو آدمی ترک کردے۔ 

الغرض شک و شبہ والے اُمور ترک کردینا ہی تقویٰ پرہیزگاری کا زینہ ہے۔ آدمی اس وقت تک متقی نہیں ہوسکتا جب تک کہ وہ شبہات کو ترک نہ کردے۔
واضح رہے کہ دل میں کھٹکنے والی بات کا معیار ہونا ان ہی اُمور میں ہے جو مشتبہات کے قبیل سے ہوں اور جن میں قرآن و حدیث میں کوئی صریح نص اور واضح حکم موجود نہ ہو۔ 

اگر کسی معاملے میں صاف و صریح حکم موجود ہو تو پھر دل میں کھٹک پیدا ہونے کا کوئی اعتبار نہیں۔