سونے کی اسپاٹ ٹریڈنگ میں جمعہ کے روز معمولی بہتری دیکھی گئی، تاہم عالمی مارکیٹ میں مسلسل تیسرے ہفتے سونے کے نرخوں میں گراوٹ کا رجحان رہا۔
مزید پڑھیں
اس گراوٹ کی بنیادی وجہ امریکی ڈالر کی بڑھتی ہوئی قدر اور فیڈرل ریزرو کی جانب سے سخت مانیٹری پالیسی کا تسلسل ہے۔
اقتصادی تجزیہ کاروں کے مطابق امریکی مرکزی بینک کی جانب سے شرح سود میں جلد کمی کے امکانات معدوم ہونے کے بعد سرمایہ کاروں کا اعتماد متاثر ہوا ہے۔
یہی وجہ ہے کہ عالمی منڈی میں اسپاٹ ٹریڈنگ میں سونے کی فی
اونس قیمت 0.2 فیصد اضافے کے ساتھ 4657.50 ڈالر تک پہنچ گئی ہے۔
اگرچہ جمعہ کے روز سونے کی قیمتوں میں معمولی اضافہ ریکارڈ کیا گیا، لیکن مجموعی طور پر رواں ہفتے کے دوران اس قیمتی دھات کی قدر میں 7 فیصد سے زائد کی نمایاں کمی واقع ہوئی ہے۔
دوسری جانب امریکی گولڈ فیوچر سودوں میں بھی تیزی دیکھی گئی ہے، جہاں اپریل کی ڈیلیوری کے لیے سونے کے معاہدے 1.1 فیصد اضافے کے ساتھ 4657.90 ڈالر فی اونس پر ٹریڈ ہو رہے ہیں۔
سونے کے علاوہ دیگر قیمتی دھاتوں کی بات کی جائے تو چاندی کی فی اونس قیمت میں 0.1 فیصد اضافہ ہوا جس کے بعد یہ 73 ڈالر پر پہنچ گئی ہے۔
اسی طرح پلاٹینم کی قیمت بھی 0.1 فیصد اضافے کے ساتھ 1972.80 ڈالر فی اونس تک پہنچ گئی ہے، جبکہ پیلیڈیم 0.4 فیصد اضافے سے 1452.21 ڈالر پر ٹریڈ ہو رہا ہے۔