بحرین کی ڈیفنس فورسز کمانڈ نے تصدیق کی ہے کہ مملکت کے فضائی دفاعی نظام نے ایران کے مسلسل حملوں کو کامیابی سے ناکام بنایا ہے۔
مزید پڑھیں
حکام کے مطابق اب تک مجموعی طور پر 141 بیلسٹک میزائل اور 242 ڈرون طیاروں کو فضا ہی میں تباہ کر دیا گیا ہے۔
کمانڈ کی جانب سے جاری بیان میں کہا گیا ہے کہ یہ حملے براہ راست بحرینی سرزمین کو نشانہ بنانے کے لیے کیے گئے تھے۔
سیکیورٹی حکام نے خبردار کیا ہے کہ اس طرح کے اندھا دھند حملے خطے کے امن و امان کے لیے براہ راست خطرہ ہیں۔
ایران، امریکہ جنگ: کیا ہو رہا ہے؟ باخبر رہنے کے لیے کلک کریں
حکام کے مطابق یہ جارحانہ اقدامات نہ صرف بین الاقوامی انسانی قوانین کے منافی ہیں بلکہ علاقائی استحکام کو نقصان پہنچانے کی ایک منظم کوشش بھی ہیں۔
بحرینی قیادت نے عوام سے اپیل کی ہے کہ وہ انتہائی احتیاط برتیں اور اپنی حفاظت کو یقینی بنائیں۔
شہریوں کو ہدایت کی گئی ہے کہ وہ متاثرہ مقامات اور مشکوک اشیا سے دُور رہیں، جبکہ عسکری کارروائیوں یا ملبے کی تصاویر بنانے سے بھی سختی سے گریز کیا جائے۔
حکومت نے عوام پر زور دیا ہے کہ وہ کسی بھی قسم کی افواہوں پر کان نہ دھریں۔
تمام تر معلومات، انتباہات اور سیکیورٹی ہدایات کے لیے صرف مملکت کے سرکاری اور مجاز ذرائع پر انحصار کیا جائے تاکہ کسی بھی قسم کی غلط فہمی یا خوف و ہراس سے بچا جا سکے۔