حرمین شریفین انتظامیہ نے اعلان کیا ہے کہ حرمین شریفین میں رمضان آپریشنل منصوبہ کامیابی سے مکمل ہوا، جہاں لاکھوں زائرین کی آمد کے باوجود ہجوم کو مؤثر انداز میں منظم رکھا گیا۔
سعودی پریس ایجنسی کے مطابق ادارے نے کہا ہے کہ مسجد الحرام اور مسجد نبوی میں پیشگی منصوبہ بندی، جدید ٹیکنالوجی اور مختلف اداروں کے باہمی تعاون سے اعلیٰ معیار کی خدمات فراہم کی گئیں۔
اس دوران اسمارٹ رہنمائی نظام، تھری ڈی نقشے، برقی گاڑیوں کے لیے مخصوص راستے اور ہوٹلوں سے حرم تک ٹرانسپورٹ جیسی سہولیات متعارف کرائی گئیں، جس سے زائرین کی آمدورفت میں نمایاں آسانی پیدا ہوئی۔
مزید برآں، انجینئرنگ کنٹرول سینٹر کے ذریعے 24 گھنٹے نگرانی، صفائی و زمزم خدمات میں بہتری، افطار کی منظم فراہمی، اور 16 سے زائد مہمان مراکز کے قیام نے زائرین کے تجربے کو بہتر بنایا۔
سیزن کے عروج پر تیسری سعودی توسیع نے لاکھوں افراد کو بآسانی سنبھالنے میں اہم کردار ادا کیا، خصوصاً 27 رمضان کی رات کو بھی انتظامات متاثر نہیں ہوئے۔