جاپانی وزیر اعظم سنائی تاکائچی اور امریکی صدر ڈونلڈ ٹرمپ کی اہم ملاقات آج متوقع ہے۔
مزید پڑھیں
اس ملاقات کا مرکزی ایجنڈا آبنائے ہرمز میں تیل بردار جہازوں کی حفاظت کے لیے جاپان کی جانب سے جنگی بحری جہاز بھیجنے کا امریکی مطالبہ ہے، جو ٹوکیو کے لیے ایک بڑا سفارتی چیلنج بن چکا ہے۔
آئین کی شق اور عسکری حدود
جاپانی آئین کی نویں شق ریاست کو جنگی کارروائیوں اور جارحانہ فوج رکھنے کے حق سے دستبردار کرتی ہے۔
اسی قانونی رکاوٹ کے باعث ٹرمپ کے مطالبے پر فوری عسکری ردعمل دینا تاکائچی حکومت کے لیے سیاسی اور آئینی اعتبار سے شدید خطرات کا باعث بن سکتا ہے۔
ایران، امریکہ جنگ: کیا ہو رہا ہے؟ باخبر رہنے کے لیے کلک کریں
2 ممکنہ راستے
ٹوکیو اس حوالے سے 3 راستوں پر غور کر رہا ہے:
پہلا یہ کہ صومالیہ کی طرز پر بحری قزاقی کے خلاف مشن کا حوالہ دیا جائے، تاہم ماہرین کے مطابق ایران جیسے ملک کے مقابل یہ قانوناً کمزور موقف ہے، جس پر جاپانی حکومت فی الحال احتیاط کا مظاہرہ کر رہی ہے۔
دوسرا آپشن 2015 کے سیکیورٹی قوانین کا استعمال ہے، جو کسی اتحادی کو خطرے کی صورت میں طاقت کے استعمال کی اجازت دیتے ہیں۔
تاہم وزیر اعظم تاکائچی نے اسے آخری حل قرار دیا ہے اور فی الحال سفارت کاری اور خطے میں کشیدگی کم کرنے کو ترجیح دی جا رہی ہے۔
تیسرا اور سب سے متوقع راستہ انٹیلیجنس اور نگرانی کے مشنز کا قیام ہے۔
اس کے تحت جاپان ایسی ٹیمیں بھیج سکتا ہے جو براہِ راست لڑائی کے بجائے صرف نگرانی کا کام کریں گی۔ یہ طریقہ ٹوکیو کو واشنگٹن کو ناراض کیے بغیر قانونی پیچیدگیوں سے بچا سکتا ہے۔
تاریخی تضاد اور امریکی دباؤ
ایک دلچسپ تاریخی حقیقت یہ ہے کہ دوسری جنگ عظیم کے بعد جاپان کا یہ پرامن آئین خود امریکہ کی معاونت سے تیار کیا گیا تھا اور اب وہی امریکہ ٹوکیو پر دباؤ ڈال رہا ہے کہ وہ اپنی آئینی حدود سے نکل کر آبنائے ہرمز میں عسکری تحفظ فراہم کرے۔
تجزیہ کاروں کا کہنا ہے کہ موجودہ صورتحال نے تاکائچی حکومت کو ایک مشکل دو راہے پر کھڑا کر دیا ہے۔
ایک طرف ان کا سب سے اہم سیکیورٹی اتحادی امریکہ ہے، جبکہ دوسری طرف وہ پرامن شناخت ہے جس پر دہائیوں سے جاپانی قوم کی ساکھ اور ملکی سیاست کی بنیاد قائم رہی ہے۔