کویت کے سکیورٹی اداروں نے بڑی کارروائی کرتے ہوئے 10 شہریوں پر مشتمل دہشتگرد سیل کو گرفتار کر لیا، جو ملک میں کالعدم تنظیم ’حزب اللہ‘ سے وابستہ تھا۔
سکیورٹی نگرانی کے دوران ان کے اہم تنصیبات کو نشانہ بنانے کے منصوبے کا انکشاف ہوا، جس کے لیے بیرونی عناصر سے رابطہ کر کے اہداف کے مقامات کی معلومات فراہم کی جا رہی تھیں۔
سبق ویب سائٹ کے مطابق کویتی وزارت داخلہ نے کہا ہے کہ تحقیقات سے معلوم ہوا کہ ملزمان نے بیرون ملک حزب اللہ کے کیمپوں میں اسلحہ کے استعمال اور ڈرون آپریشن کی تربیت حاصل کی تھی، اور وہ تخریبی کارروائیوں کی تیاری کر رہے تھے تاکہ ریاست کی خودمختاری کو نقصان پہنچایا جا سکے اور معاشرے میں خوف و ہراس پھیلایا جائے۔
بیان میں کہا گیا کہ گرفتار افراد نے اپنے جرائم کا تفصیلی اعتراف کیا ہے جبکہ سکیورٹی ادارے مزید تفتیش اور قانونی کارروائی جاری رکھے ہوئے ہیں۔
وزارت داخلہ نے خبردار کیا کہ ملکی سلامتی کو نقصان پہنچانے یا دہشتگرد تنظیموں سے تعاون کرنے والوں کے خلاف سخت ترین اقدامات کیے جائیں گے اور ایسے تمام خطرات کا بھرپور قوت سے مقابلہ کیا جائے گا۔