سعودی ایئر لائن ’فلائی ناس‘ (flynas) نے بدھ کے روز 2025 کے مالیاتی نتائج جاری کیے ہیں، جن کے مطابق کمپنی کو سال کے اختتام پر 527 ملین ریال کا خالص خسارہ ہوا ہے۔
مزید پڑھیں
یہ نتائج 2024 کے مقابلے میں نمایاں فرق ظاہر کرتے ہیں جب کمپنی نے 433.5 ملین ریال کا منافع کمایا تھا، تاہم کمپنی نے واضح کیا ہے کہ یہ خسارہ بنیادی طور پر ان غیر اختیاری اخراجات کی وجہ سے ہے جو پبلک آفرنگ (IPO) کے عمل پر خرچ ہوئے۔
کمپنی کے مطابق اگر 1.083 ارب ریال کے ان یک وقتی اخراجات کو نکال دیا جائے تو کمپنی کا ایڈجسٹڈ خالص منافع 556 ملین ریال بنتا ہے، جو
کہ 2024 کے 434 ملین ریال کے منافع کے مقابلے میں 28 فیصد زیادہ ہے۔
مالیاتی رپورٹ کے مطابق فلائی ناس کی مجموعی آمدنی میں 4 فیصد اضافہ ہوا ہے، جو گزشتہ سال کے 7.55 ارب ریال سے بڑھ کر 7.84 ارب ریال تک پہنچ گئی ہے۔
کمپنی کی آمدنی کا سب سے بڑا حصہ یعنی 90 فیصد ’اکانومی ایوی ایشن‘ سے حاصل ہوا، جس نے 4 فیصد اضافے کے ساتھ 7.086 ارب ریال کمائے۔
اس ترقی کی وجہ فلائٹ نیٹ ورک میں توسیع اور آپریشنل دائرہ کار میں اضافہ ہے، جس میں سستی سفری سہولیات کے ذریعے مانگ میں اضافہ کیا گیا۔
دوسری جانب حج و عمرہ سیکٹر کی آمدنی 584 ملین ریال پر مستحکم رہی، جبکہ جنرل ایوی ایشن آمدن میں 6 فیصد کمی ہوئی، جو 174 ملین ریال ریکارڈ کی گئی اور مجموعی آمدنی میں اس کا حصہ محض 2 فیصد رہا۔
کمپنی نے اپنی طویل مدتی حکمت عملی میں تبدیلی کرتے ہوئے طیاروں کی براہِ راست فنانسنگ کا آغاز کیا ہے تاکہ فی یونٹ لاگت کی کارکردگی کو بہتر بنایا جا سکے۔
اسی وجہ سے ’سیل اینڈ لیز بیک‘ (فروخت اور دوبارہ لیز پر لینے) کے سودوں سے ہونے والا منافع 2024 کے 131 ملین ریال کے مقابلے میں کم ہو کر 76 ملین ریال رہا۔
اس تبدیلی کے باوجود طیاروں کے بیڑے میں اضافے، آپریشنل صلاحیت میں بہتری، محصولات کے بہتر انتظام اور ڈیجیٹل سسٹمز میں سرمایہ کاری کی بدولت کمپنی کا خالص منافع کا مارجن 6 فیصد سے بڑھ کر 7 فیصد ہو گیا ہے، جو کمپنی کی مالیاتی نظم و ضبط اور ترقی کے عزم کی عکاسی کرتا ہے۔