اسرائیلی سائبر سیکیورٹی ڈائریکٹوریٹ نے تصدیق کی ہے کہ ایرانی سائبر حملوں نے اسرائیل بھر میں مختلف اداروں کو نشانہ بنایا ہے۔
مزید پڑھیں
یروشلم پوسٹ کی رپورٹ کے مطابق ان حملوں کا بنیادی مقصد معلومات اور سسٹمز کو تباہ کرنا تھا تاکہ اسرائیلی معیشت اور نجی و سرکاری اداروں کے کام کو درہم برہم کیا جا سکے۔
حکام کا کہنا ہے کہ ایران کے خلاف جنگ کے آغاز ہی سے انہیں مختلف محکموں اور تنظیموں کی جانب سے شکایات مل رہی ہیں اور ان کی ٹیمیں ان حملوں کو روکنے اور انہیں بے اثر کرنے کے لیے کوشاں ہیں۔
اسرائیلی ڈائریکٹوریٹ کے سربراہ یوسی کراڈی نے اس صورتحال پر تبصرہ کرتے ہوئے خبردار کیا ہے کہ ان نئے سائبر حملوں کی لہر نے یہ ثابت کر دیا ہے کہ کوئی بھی ادارہ، چاہے وہ چھوٹا ہو یا بڑا، ہیکرز کا ہدف بن سکتا ہے۔
ایران، امریکہ جنگ: اپ ڈیٹ رہنے کے لیے کلک کریں
انہوں نے تمام سرکاری اور نجی اداروں پر زور دیا ہے کہ وہ اپنی ڈیجیٹل سیکیورٹی کو مزید مضبوط کریں اور حفاظتی معیارات پر سختی سے عمل کریں۔
یوسی کراڈی نے واضح کیا کہ اب تک ان سائبر حملوں کے نتیجے میں اسرائیل کے کسی بھی بنیادی یا اہم ڈھانچے (کریٹیکل انفرا اسٹرکچر) کو کوئی نقصان نہیں پہنچا ہے جو معیشت کے لیے ضروری ہیں۔
ڈائریکٹوریٹ کے مطابق ایرانی ہیکرز نے اداروں کے نیٹ ورکس تک رسائی حاصل کرنے کے لیے ان صارفین کے لاگ ان ڈیٹا کا استعمال کیا جو ماضی میں چوری ہو چکا تھا یا پچھلے حملوں کے دوران ٹیسٹ کیا گیا تھا۔
اس کے علاوہ ہیکرز نے ان تکنیکی پرزوں اور سافٹ ویئرز کا فائدہ اٹھایا جو دور دراز سے سسٹمز تک رسائی کے لیے استعمال ہوتے ہیں۔
اسی طرح نیٹ ورک میں داخل ہونے کے بعد ہیکرز نے ڈیٹا اور سسٹمز کو حذف کر دیا، جس کے پیش نظر ڈائریکٹوریٹ نے تمام اداروں کو ہدایت کی ہے کہ وہ پاس ورڈ مینجمنٹ کے پروٹوکول کو سخت کریں اور ریموٹ رسائی کے چینلز کو مکمل طور پر محفوظ بنائیں۔