وزارتِ امورِ اسلامی، دعوت و ارشاد نے بنگلہ دیش میں خادم الحرمین الشریفین رمضان المبارک پروگراموں کا باقاعدہ آغاز کر دیا ہے۔
مزید پڑھیں
یہ سرگرمیاں سفارتخانے میں قائم مذہبی اتاشی کے دفتر کے تحت شروع کی گئی ہیں، جس کی افتتاحی تقریب دارالحکومت ڈھاکہ میں سعودی سفارتخانے کے ہیڈکوارٹر میں منعقد ہوئی۔
یاد رہے کہ یہ پروگرامز سال 1447 ہجری کے لیے ترتیب دیے گئے ہیں۔
رمضان پروگرامز میں مستحقین میں کھجوروں کی تقسیم، روزہ داروں کے لیے افطار کا اہتمام، قرآنِ کریم کے نسخوں کی فراہمی اور ائمہ کرام کی
تعیناتی شامل ہے، جو رمضان المبارک کے دوران نمازوں کی امامت کریں گے۔
تقریب میں بنگلہ دیش میں سعودی سفیر ڈاکٹر عبداللہ بن ظافر بن عبیہ، مذہبی اتاشی مبارک بن عامق العنزی اور مختلف ممتاز اسلامی شخصیات نے شرکت کی۔
سفیر ڈاکٹر عبداللہ بن ظافر بن عبیہ نے اس موقع پر کہا کہ رمضان پروگراموں پر عمل درآمد سعودی قیادت کی ہدایات کے مطابق کیا جا رہا ہے۔ انہوں نے بتایا کہ وزارتِ امورِ اسلامی کی نگرانی میں یہ رمضان اقدامات دنیا کے 120 ممالک میں جاری ہیں۔
انہوں نے کہا کہ بنگلہ دیش کے حصے میں 40 ٹن اعلیٰ معیار کی سعودی کھجوروں کی تقسیم شامل ہے، جبکہ افطار پروگرام 70 ممالک میں شروع کیا جا رہا ہے۔ اس کے علاوہ قرآنِ کریم کے نسخے بھی تقسیم کیے جائیں گے اور متعدد ائمہ کرام کو رمضان المبارک کے دوران امامت کے لیے بھیجا جائے گا۔
مذہبی اتاشی مبارک بن عامق العنزی نے کہا کہ یہ اقدامات سعودی عرب کے انسانی ہمدردی پر مبنی پیغام اور اسلامی خدمات میں اس کے قائدانہ کردار کی عکاسی کرتے ہیں۔
انہوں نے مزید کہا کہ ان پروگراموں کے ذریعے اعتدال اور رواداری کی اقدار کو فروغ دیا جا رہا ہے۔ انہوں نے رمضان المبارک کے دوران ان مذہبی اور فلاحی سرگرمیوں کے مؤثر انعقاد میں بنگلہ دیش کی حکومت کے تعاون کو سراہا۔