رمضان المبارک میں کھجور افطار دسترخوان کا لازمی حصہ سمجھی جاتی ہے اور ریاض ریجن کی پیداوار اس روایت کو مزید تقویت دیتی ہے، جہاں سالانہ تقریباً 4 لاکھ 57 ہزار ٹن کھجوریں تیار کی جاتی ہیں۔
مزید پڑھیں
سبق ویب سائٹ کے مطابق قدرتی شکر، معدنیات اور پروٹین سے بھرپور کھجور روزہ افطار کے بعد فوری توانائی فراہم کرنے کے ساتھ ساتھ معدے کو کھانے کے لیے تیار کرتی ہے۔ اسی لیے یہ رمضان کی بنیادی غذاؤں میں شمار ہوتی ہے۔
نیشنل سینٹر فار پامز اینڈ ڈیٹس کے مطابق سعودی عرب میں اعلیٰ معیار کی 400 سے زائد اقسام کی کھجوریں پیدا ہوتی ہیں، جو ملک کے
مختلف علاقوں میں کاشت کی جاتی ہیں۔ یہ تنوع نہ صرف غذائی تحفظ کو مضبوط بناتا ہے بلکہ قومی معیشت کو سہارا دینے اور وژن 2030 کے اہداف کے حصول میں بھی مددگار ہے۔
مرکز کے اعداد و شمار کے مطابق ریاض ریجن میں 8.177 ملین سے زائد کھجور کے درخت موجود ہیں اور 21 ہزار سے زیادہ فارم فعال ہیں۔ اس خطے میں 49 اقسام کی کھجوریں پیدا کی جاتی ہیں جبکہ 60 سے زائد فیکٹریاں کھجوروں کی پراسیسنگ اور تیاری میں مصروف ہیں۔
ریاض کی نمایاں اقسام میں خضری، صقعی، خلاص اور برحی شامل ہیں، جو اپنے معیار اور غذائی افادیت کے باعث رمضان میں صارفین کی اولین پسند بنتی ہیں۔
یہ پیداوار نہ صرف مقامی ضروریات پوری کرتی ہے بلکہ سعودی کھجوروں کو عالمی منڈیوں میں بھی ممتاز مقام دلاتی ہے۔
