رمضان میں کھجور افطار کا لازمی حصہ سمجھی جاتی ہے۔ عرب معاشروں میں یہ صرف مہمان نوازی کی علامت نہیں بلکہ توانائی اور صحت کا قدرتی ذریعہ بھی ہے۔
مزید پڑھیں
اکثر لوگ یہ فرق نہیں جانتے کہ رطب (تازہ) اور تمر (خشک) کھجور میں اصل فرق کیا ہے۔ کیا دونوں ایک ہی چیز ہیں؟ کیا ان کے غذائی فوائد یکساں ہوتے ہیں؟ اور کون سا مرحلہ کس موسم یا جسمانی ضرورت کے لیے زیادہ موزوں ہے؟
ان سوالات کے جواب سمجھنا ضروری ہے، خاص طور پر ایسے وقت میں جب آپ صحت سے متعلق زیادہ حساس ہوں۔
کھجور کی تیاری کے مراحل:
1: بلح (کچے، نسبتاً سخت) 2: رطب (تازہ، نرم) 3: تمر (خشک)
کھجور اپنی نشوونما کے دوران تین اہم مراحل سے گزرتی ہے۔ ابتدائی مرحلہ ’بصر‘ یا ’بلح‘کہلاتا ہے۔ اس مرحلے میں پھل نسبتاً سخت ہوتا ہے اور اس میں قدرتی شکر کی مقدار کم ہوتی ہے جبکہ فائبر زیادہ پایا جاتا ہے۔
دوسرا مرحلہ ’رطب‘کہلاتا ہے۔ رطب دراصل تازہ اور نرم کھجور ہوتی ہے جس میں نمی زیادہ ہوتی ہے۔ اس میں قدرتی شکر مناسب مقدار میں موجود ہوتی ہے، جس سے جسم کو فوری توانائی ملتی ہے مگر کیلوریز نسبتاً کم رہتی ہیں۔ اسی لیے اسے گرم یا معتدل موسم میں زیادہ پسند کیا جاتا ہے۔
تیسرا اور آخری مرحلہ ’تمر‘ ہے۔ یہ مکمل طور پر پکی ہوئی اور خشک یا نیم خشک کھجور ہوتی ہے۔ اس میں نمی کم اور شکر زیادہ ہوتی ہے، جس کی وجہ سے یہ زیادہ توانائی فراہم کرتی ہے اور اس کی کیلوریز زیادہ ہو جاتی ہیں۔
رطب اور تمر میں غذائی فرق؟
رطب اور تمر کے درمیان سب سے نمایاں فرق نمی اور شکر کی مقدار کا ہے۔ رطب میں پانی کی مقدار زیادہ ہوتی ہے، اسی لیے اس میں کیلوریز کم ہوتی ہیں۔
100 گرام رطب میں تقریباً 124 کیلوریز پائی جاتی ہیں، جبکہ اسی مقدار کے تمر میں تقریباً 284 کیلوریز ہوتی ہیں۔ اس کا مطلب ہے کہ تمر توانائی کے لحاظ سے رطب سے دو گنا سے بھی زیادہ طاقتور ہے۔
تمر میں کاربوہائیڈریٹس یعنی نشاستہ اور قدرتی شکر کی مقدار زیادہ ہوتی ہے، جو جسم کو زیادہ اور دیرپا توانائی فراہم کرتی ہے۔
اس کے علاوہ تمر میں فائبر کی مقدار بھی زیادہ ہوتی ہے، جو نظامِ ہضم بہتر بنانے، خون میں شکر کو متوازن رکھنے اور خراب کولیسٹرول کم کرنے میں مددگار ثابت ہوتی ہے۔
معدنیات کے اعتبار سے بھی تمر نسبتاً زیادہ مضبوط ہے۔ اس میں کیلشیم اور آئرن کی مقدار رطب کے مقابلے میں زیادہ پائی جاتی ہے۔ کیلشیم ہڈیوں کی مضبوطی کے لیے ضروری ہے جبکہ آئرن خون کی کمی کو روکنے میں مدد دیتا ہے۔
دوسری طرف رطب کی خاص بات یہ ہے کہ اس میں وٹامن سی موجود ہوتا ہے، جو خشک ہونے کے عمل کے دوران تقریباً ختم ہو جاتا ہے، اسی لیے تمر میں وٹامن سی نہ ہونے کے برابر رہ جاتا ہے۔
صحت کے لحاظ سے کون زیادہ بہتر ہے؟
یہ کہنا درست نہیں کہ رطب یا تمر میں سے کوئی ایک ہمیشہ بہتر ہے۔ اصل انتخاب فرد کی جسمانی ضرورت، موسم اور صحت کی کیفیت پر منحصر ہوتا ہے۔
اگر کسی کو زیادہ توانائی درکار ہو، جیسے جسمانی مشقت کرنے والے افراد یا سرد موسم میں رہنے والے لوگ، تو تمر زیادہ موزوں ہو سکتا ہے کیونکہ اس میں توانائی مرتکز صورت میں موجود ہوتی ہے۔
دوسری طرف اگر کوئی شخص کم کیلوریز لینا چاہتا ہو، یا اسے دل اور فشارِ خون یعنی بلڈ پریشر کا مسئلہ ہو، تو رطب زیادہ مناسب ہو سکتا ہے کیونکہ اس میں نمی زیادہ اور شکر کی مقدار نسبتاً کم ہوتی ہے۔ البتہ ذیابیطس یا دیگر دائمی امراض میں مقدار کا تعین طبی مشورے سے کرنا چاہیے۔
سعودی کھجوروں کی مشہور اقسام اور شناخت
سعودی عرب کھجور کی پیداوار اور اقسام کے لحاظ سے دنیا کے اہم ممالک میں شامل ہے۔ یہاں کے مختلف علاقوں کی آب و ہوا اور مٹی کے فرق کی وجہ سے ہر خطہ اپنی مخصوص قسم کے لیے پہچانا جاتا ہے۔
القصیم کا علاقہ سکری، صقعی اور نبتة علی کے لیے مشہور ہے۔ مدینہ منورہ عجوة، عنبرة اور برنی جیسی اقسام کی وجہ سے معروف ہے، جن میں عجوة کو خاص مذہبی اور تاریخی اہمیت بھی حاصل ہے۔
الاحسا میں خلاص، رزيز اور شيشي نمایاں ہیں۔ الخرج اور اس کے گرد و نواح میں خشرم، خلاص اور خضري جیسی اقسام کاشت کی جاتی ہیں۔ بیشة صفري کے لیے جانی جاتی ہے جبکہ حائل الصفرا کے لیے مشہور ہے۔
دلچسپ بات یہ ہے کہ ایک ہی قسم، مثلاً خلاص، مختلف علاقوں میں ذائقے اور ساخت میں مختلف ہو سکتی ہے۔ اس کی وجہ زرعی طریقہ کار، آب و ہوا اور دیکھ بھال کے انداز میں فرق ہے۔
عالمی سطح پر مشہور اقسام
عالمی منڈی میں ’دقلة نور‘اور ’مجدول‘جیسی اقسام کو خاص شہرت حاصل ہے اور یہ امریکہ و یورپ میں بھی اپنے اصل نام سے فروخت ہوتی ہیں۔ حالیہ برسوں میں سعودی اقسام بھی بین الاقوامی سطح پر متعارف ہو رہی ہیں، جس سے کھجور نہ صرف غذائی بلکہ معاشی اہمیت بھی اختیار کر چکی ہے۔
طبی ماہرین بتاتے ہیں کہ رطب اور تمر دونوں قدرتی توانائی کا خزانہ ہیں، مگر ان کا استعمال شعور اور توازن کے ساتھ ہونا چاہیے۔ رمضان کے دوران یا روزمرہ زندگی میں انتخاب کرتے وقت ذاتی صحت، موسم اور مقدار کو مدنظر رکھنا ضروری ہے۔