خالد نواز چیمہ
جدہ
وفاقی وزیرِ مملکت چوہدری ارمغان سبحانی، ممبر پنجاب اسمبلی رانا فیاض کے ہمراہ عمرہ کی سعادت کے لیے جدہ پہنچ گئے۔
جدہ ائیرپورٹ پر پاکستان مسلم لیگ (ن) سعودی عرب کے چیئرمین چوہدری اکرم گجر نے اپنی ٹیم کے ہمراہ ان کا پرتپاک استقبال کیا۔
اس موقع پر چوہدری اکرم گجر اور ان کی ٹیم نے وفاقی وزیرِ مملکت اور ان کے ہمراہ آنے والے وفد کو گلدستے پیش کر کے خوش آمدید کہا اور ان کی آمد پر نیک خواہشات کا اظہار کیا۔
استقبالیہ میں میاں رضوان الحق، چوہدری طارق اقبال، میاں وسیم، عاصم گجر اور محمد بوٹا سمیت دیگر اہم شخصیات بھی موجود تھیں۔
چوہدری ارمغان سبحانی نے اس موقع پر میزبان شخصیات کا شکریہ ادا کرتے ہوئے کہا کہ سعودی عرب آمد ان کے لیے باعث سعادت ہے۔
انہوں نے کہا کہ وہ عمرہ کی ادائیگی کے ساتھ ساتھ سعودی عرب میں مقیم پاکستانی کمیونٹی سے بھی ملاقاتیں کریں گے اور ان کے مسائل سنیں گے۔
ان کا کہنا تھا کہ پاکستانی کمیونٹی سعودی عرب میں انتھک محنت کر رہی ہے اور پاکستان کا نام روشن کر رہی ہے۔
واضح رہے کہ اس موقع پر ممبر پنجاب اسمبلی رانا فیاض بھی عمرہ کی ادائیگی کے لیے سعودی عرب پہنچے، جن کا بھی پرتپاک انداز میں استقبال کیا گیا۔