رمضان کا آغاز ہوتے ہی جب سال بھر میں سب سے زیادہ معتمرین سعودی عرب کا رخ کرتے ہیں، وزارتِ حج و عمرہ نے ایک جامع ڈیجیٹل نظام فعال کر دیا ہے جو ضیوفِ رحمن کے سفر کو ویزا کے اجرا سے لے کر مملکت سے واپس روانگی تک منظم انداز میں سنبھالتا ہے۔
مزید پڑھیں
اس مربوط تکنیکی نظام کا مقصد تمام سرگرمیوں کو آسان بنانا، ہجوم کو منظم رکھنا اور عبادت کے تجربے کے معیار کو بہتر بنانا ہے۔
العربیہ کے مطابق مملکت نے عمرہ ویزا کے حصول کے لیے متعدد ذرائع فراہم کیے ہیں، جن میں وزارتِ خارجہ کا الیکٹرانک ویزا پلیٹ فارم، بیرون ملک منظور شدہ ایجنٹس اور ’نسک‘ پلیٹ فارم شامل ہیں جو لائسنس یافتہ سروس فراہم کنندگان کے ذریعے مکمل پیکجز پیش کرتا ہے۔
اس طرح سے مقررہ ضوابط کے تحت دنیا بھر کے مسلمان عمرہ ادا کرنے اور مسجد نبوی کی زیارت کر سکتے ہیں۔
مسجد الحرام جانے سے قبل ’نسک‘ ایپ کے ذریعے باضابطہ اجازت نامہ حاصل کرنا لازمی قرار دیا گیا ہے۔ یہ ایپ عمرہ اور روضہ شریف میں نماز کے اوقات کی بکنگ، الیکٹرانک انٹری کوڈ کے اجرا، مقررہ اوقات کی یاد دہانی اور رش کے اوقات و مقامات کی نشاندہی جیسی سہولیات فراہم کرتی ہے۔
ایپ میں متعدد زبانوں کی سہولت موجود ہے جس سے مختلف ممالک سے آنے والے زائرین کے لیے رہنمائی آسان ہو جاتی ہے اور انسانی ہجوم کے بہاؤ کو مؤثر انداز میں منظم کیا جا سکتا ہے۔
اسی طرح سعودی عرب میں نقل و حرکت کے حوالے سے بھی سہولیات فراہم کی گئی ہیں۔ ٹرانزٹ ویزا رکھنے والے افراد مخصوص شرائط کے ساتھ 96 گھنٹے تک قیام کر کے عمرہ ادا کر سکتے ہیں، جبکہ عمرہ ویزا ہولڈرز کو ویزا کی مدت کے دوران مملکت کے مختلف علاقوں میں آمد و رفت کی اجازت ہے۔
یہ انتظام ایک ایسے فریم ورک کے تحت ہے جو سہولت اور نظم و ضبط کے درمیان توازن قائم رکھتا ہے۔
کنگ عبدالعزیز انٹرنیشنل ایئرپورٹ (جدہ) اور مکہ مکرمہ کے درمیان حرمین ہائی اسپیڈ ٹرین، بسیں، ٹیکسیاں اور اسمارٹ ٹرانسپورٹ ایپس دستیاب ہیں، جو سفر کو آسان بناتی ہیں۔
اسی طرح مدینہ منورہ تک رسائی کے لیے ٹرین، فضائی سفر اور زمینی بس سروسز موجود ہیں، جس سے دونوں مقدس شہروں کے درمیان آمد و رفت میں روانی برقرار رہتی ہے۔
#جاي_للعمرة؟
— وزارة الحج والعمرة (@HajMinistry) January 25, 2026
من أول خطوة… إلى آخر دعاء
رحلة إيمانية نمهّد لك فيها الطريق؛ لتؤدي نسكك بيسر وطمأنينة. pic.twitter.com/Kxypx4KJzU
ساتھ ساتھ مسجد الحرام اور مسجد نبوی کے اندر بھی جدید سہولیات فراہم کی گئی ہیں۔ ان میں دستی اور برقی گاڑیاں، رہنمائی اور فوری ترجمہ مراکز، ’نسک‘ کے ذریعے روضہ کی زیارت کا منظم نظام، امانت مراکز، آبِ زمزم کی فراہمی اور ڈیجیٹل رہنمائی پلیٹ فارمز شامل ہیں۔
یہ تمام انتظامات زائرین کے آرام اور سلامتی کو یقینی بنانے کے لیے کیے گئے ہیں۔
متعلقہ حکام نے زائرین پر زور دیا ہے کہ وہ سکون اور نظم و ضبط کا خیال رکھیں، دھکم پیل سے گریز کریں، عبادت میں خلل ڈالنے والی فوٹوگرافی سے بچیں اور ممنوع اشیا ساتھ نہ لائیں۔
حکام کی جانب سے سفر سے قبل صحت سے متعلق تیاری اور واپسی کے ضوابط پر عمل کی بھی ہدایت کی گئی ہے تاکہ محفوظ اور سہل تجربہ یقینی بنایا جا سکے۔
یہ مکمل ڈیجیٹل نظام اس بات کا عکاس ہے کہ مملکت عمرہ سیزن کے انتظام کو جدید، مربوط اور پائیدار انداز میں چلانے کی حکمت عملی پر گامزن ہے، جہاں تکنیکی اور انتظامی ہم آہنگی کے ذریعے رمضان میں ضیوفِ الرحمن کو اعلیٰ معیار کی سہولت اور تحفظ فراہم کیا جا رہا ہے۔
