رمضان کا آغاز ہوتے ہی ’ریاض میٹرو پروجیکٹ‘ کے نئے اوقات نافذ کر دیے گئے ہیں، جن کے مطابق ٹرین سروس ہفتے کے تمام دن آدھی رات کے بعد تک جاری رہے گی۔
مزید پڑھیں
اس اقدام کا مقصد دارالحکومت ریاض میں رمضان کے مصروف اوقات کے دوران شہریوں اور مقیم افراد کی سفری ضروریات کو پورا کرنا اور مختلف مقامات تک آمد و رفت کو مزید آسان بنانا ہے۔
انتظامیہ کے مطابق اتوار سے جمعرات تک ٹرین صبح 8 بجے سے چلنا شروع ہوگی اور یہ سروس رات ڈھائی بجے کے بعد تک جاری رہے گی۔ ان اوقات کا تعین اس انداز سے کیا گیا ہے کہ ملازمین، طلبہ اور
خریداری کے لیے نکلنے والے افراد رمضان کے مخصوص معمولات کے مطابق با آسانی سفر کر سکیں۔
اسی طرح جمعہ کے روز ٹرین کی سروس صبح 11 بجے شروع ہوگی اور رات 3 بجے کے بعد تک جاری رہے گی، تاکہ ہفتہ وار تعطیل کے دوران بڑھتی ہوئی آمد و رفت کو بہتر طریقے سے سنبھالا جا سکے۔
علاوہ ازیں ہفتہ کے دن ٹرینوں کے اوقات صبح 11 بجے سے رات ڈھائی بجے کے بعد تک مقرر کیے گئے ہیں، جس سے ویک اینڈ کے اختتام پر بھی مسافروں کو سہولت میسر رہے گی۔
رمضان کے لیے ان خصوصی اوقات کے نفاذ کا مقصد ریاض میں پبلک ٹرانسپورٹ کی کارکردگی کو بہتر بنانا اور شہریوں کو محفوظ اور قابل اعتماد سفری سہولت فراہم کرنا ہے۔
حکام کے مطابق یہ نظام رمضان کے سماجی اور روحانی معمولات سے ہم آہنگ رکھتے ہوئے ترتیب دیا گیا ہے تاکہ مسافر اطمینان اور سہولت کے ساتھ اپنی منزل تک پہنچ سکیں اور شہر میں ٹریفک کی روانی برقرار رہے۔