خادم الحرمین الشریفین شاہ سلمان بن عبدالعزیز آل سعود اور ولی عہد و وزیراعظم شہزادہ محمد بن سلمان کو ماہِ رمضان المبارک کی آمد پر اسلامی ممالک کے قائدین کی جانب سے تہنیتی پیغامات موصول ہوئے ہیں۔
یہ بھی پڑھیں:
ان پیغامات میں مسلم دنیا کے سربراہان نے سعودی قیادت کے لیے نیک خواہشات کا اظہار کیا ہے، جبکہ شاہ سلمان اور ولی عہد نے بھی ان تمام قائدین کو جوابی پیغامات بھیجے ہیں جن میں ان کے مخلصانہ جذبات اور دعاؤں کا شکریہ ادا کیا گیا ہے۔
سعودی قیادت نے اپنے جوابی پیغامات میں دعا کی کہ اللہ ماہِ صیام کو امتِ مسلمہ کے لیے خیر و برکت، امن اور استحکام کا ذریعہ بنائے۔
شاہ سلمان اور شہزادہ محمد بن سلمان نے اس عزم کا اظہار کیا کہ رمضان کی یہ پرمسرت گھڑیاں تمام مسلمانوں کے لیے اتحاد اور بھائی چارے کی فضا کو مزید مستحکم کریں گی۔ انہوں نے عالمی مسلم برادری کے لیے سلامتی اور خوشحالی کی خواہش کا اعادہ بھی کیا ہے۔
دوسری جانب خادم الحرمین الشریفین اور ولی عہد نے اپنی دیرینہ روایت کو برقرار رکھتے ہوئے خود بھی اسلامی ممالک کے سربراہان کو رمضان کی مبارکباد کے خصوصی پیغامات ارسال کیے ہیں۔
ان پیغامات میں سعودی قیادت نے دعا کی ہے کہ رب العزت تمام مسلمانوں کی عبادات اور صالح اعمال کو اپنی بارگاہ میں قبول فرمائے۔ انہوں نے خصوصی طور پر امتِ مسلمہ کی عزت، ترقی اور مزید خوشحالی کے لیے اللہ تعالیٰ کے حضور التجا کی ہے۔