ریاض میں خادم الحرمین الشریفین شاہ سلمان بن عبدالعزیز آل سعود کے سامنے ان اعلیٰ حکام نے اپنے عہدوں کا حلف اٹھایا ہے جن کی تقرری کے شاہی فرامین حال ہی میں جاری کیے گئے تھے۔
مزید پڑھیں
سعودی پریس ایجنسی کے مطابق اس باوقار تقریب میں نئے مقرر ہونے والے ریجنل نائبین، مجلس شوریٰ کے رکن اور کابینہ کے رکن نے شرکت کی۔ حلف اٹھانے والوں نے اللہ تعالی کو گواہ بنا کر اپنے دین، بادشاہ اور مملکت کے ساتھ وفاداری، ریاستی رازوں کی حفاظت اور اپنے فرائض دیانتداری اور انصاف کے ساتھ ادا کرنے کا عہد کیا۔
حلف اٹھانے والے شہزادوں میں صوبہ باحہ کے نائب امیر شہزادہ فہد
بن سعد بن عبداللہ بن عبدالعزیز بن ترکی، مجلس شوریٰ کے رکن شہزادہ ڈاکٹر سعد بن سعود بن محمد بن عبدالعزیز آل سعود بن فیصل، صوبہ مدینہ منورہ کے نائب امیر شہزادہ سعود بن نہار بن سعود اور شمالی سرحدی صوبے کے نائب امیر شہزادہ محمد بن عبداللہ بن عبدالعزیز شامل تھے۔
ان تمام شخصیات نے اجتماعی طور پر ملکی مفادات کے تحفظ اور عدل و انصاف کے ساتھ کام کرنے کا حلف لیا۔
ان اعلیٰ عہدیداروں کے ساتھ ساتھ نو منتخب وزیر سرمایہ کاری فہد بن عبدالجلیل بن علی آل سیف نے بھی شاہ سلمان کے سامنے اپنے عہدے کا حلف اٹھایا۔ انہوں نے اپنے حلف میں ملک و ملت کے ساتھ وفاداری اور اپنی ذمہ داریاں مکمل سچائی، امانت داری اور اخلاص کے ساتھ نبھانے کا پختہ ارادہ ظاہر کیا۔
یہ تقرری مملکت میں سرمایہ کاری کے شعبے کو مزید فعال بنانے اور قومی اہداف کے حصول کی جانب ایک اہم قدم قرار دی جا رہی ہے۔
تقریبِ حلف برداری کے موقع پر وزیر داخلہ شہزادہ عبدالعزیز بن سعود بن نايف بن عبدالعزیز اور خادم الحرمین الشریفین کے نائب خصوصی سیکرٹری تمیم بن عبدالعزیز السالم بھی موجود تھے۔
حلف برداری کی یہ اہم تقریب دارالحکومت ریاض میں منعقد ہوئی، جو سعودی عرب کی انتظامی قیادت میں ہونے والی نئی تبدیلیوں اور مملکت کے مختلف شعبوں میں گورننس کو مزید بہتر بنانے کی کڑی ہے۔