سعودی وزارتِ اسلامی امور اور دعوت و ارشاد کے ریجنل دفتر نے جازان کے تمام اضلاع میں رمضان کی تیاریاں مکمل کر لی ہیں۔
مزید پڑھیں
سبق ویب سائٹ کے مطابق اس سلسلے میں ریجن بھر کی 9 ہزار 700 سے زائد جامع مساجد، عام مساجد اور خواتین کے لیے مخصوص مصلیٰ جات کو عبادت گزاروں کے استقبال کے لیے تیار کر دیا گیا ہے۔
ان اقدامات کا مقصد رمضان کے مقدس مہینے میں شہریوں اور مقیم افراد کو عبادت کے لیے بہترین اور پرسکون ماحول فراہم کرنا ہے۔
تیاریوں کے اس عمل میں تمام مساجد کی جامع مرمت، صفائی ستھرائی
اور تزئین و آرائش کا کام مکمل کیا گیا ہے جبکہ مساجد کو جراثیم کش ادویات سے صاف کرنے کے ساتھ ساتھ انہیں خوشبوؤں سے معطر بھی کیا گیا ہے تاکہ نمازی خشوع و خضوع کے ساتھ اپنی نمازیں، بالخصوص نمازِ تراویح اور قیام اللیل ادا کر سکیں۔
انتظامیہ نے پہلے سے موجود تمام تکنیکی شکایات کا ازالہ کر کے مساجد کی مکمل فعالیت کو یقینی بنایا ہے۔
رضاکارانہ کاموں کے حوالے سے وزارت نے رمضان کے آغاز پر 840 مختلف رضاکارانہ مواقع فراہم کرنے کا اعلان کیا ہے۔ ان مواقع کے ذریعے 5 ہزار 800 رضاکار اپنی خدمات پیش کر سکیں گے، جن کے کل اوقات کار 17 ہزار 500 گھنٹوں سے زائد بنتے ہیں۔
ان رضاکاروں کی ذمہ داریوں میں مساجد میں نمازیوں کی آمد و رفت کو منظم کرنا، افطار دسترخوانوں کی نگرانی اور پانی کی بوتلیں تقسیم کرنا شامل ہے۔
رضاکارانہ مہم کا دائرہ ریجن کی 630 جامع مساجد اور خواتین کے مصلیٰ جات تک پھیلا ہوا ہے۔ رضاکار نئے قرآن پاک کے نسخے رکھنے کے علاوہ صفائی اور دیکھ بھال کے کاموں میں بھی معاونت کریں گے۔
یہ تمام سرگرمیاں سرکاری اداروں اور غیر منافع بخش تنظیموں کے ساتھ اشتراکِ عمل کے ذریعے انجام دی جا رہی ہیں تاکہ معاشرتی تعاون کے جذبے کو فروغ دیا جا سکے۔
وزارت کے علاقائی دفتر نے ان تمام کوششوں کو اللہ کے گھروں کی خدمت اور زائرین کے آرام کو یقینی بنانے کے اپنے عزم کا حصہ قرار دیا ہے۔